„Þegar maður lendir í þessu á eigin skinni. Fótboltavöllur í götunni sem strákarnir mínir hafa alltaf verið að sækja. Það er mótttökustöð hérna í hverfinu og það var maður sem var að koma og ráðast á börnin að tilefnislausu.Maður var farinn að fylgja strákunum á fótboltavöllinn og fylgjast með þeim. Þetta var óþægilegt og öryggisógn, maður upplifði ógn á öryggi barnanna,“
segir Einar Geir Þorsteinsson, oddviti Miðflokksins í Hafnarfirði, sem er nýjasti gestur Spjallsins með Frosta Logasyni.
„Ég fór að hafa áhyggjur hvort þjóðfélagið væri farið að þróast í slæma átt. Maður hugsar þetta þegar maður er með börn sjálfur, það vakna upp spurningar. Ég svona einhvern veginn ákvað að dempa mér í þetta [stjórnmálin].“
Segir Einar Geir að á síðasta ári hafi verið nánast tvær fréttir vikulega um ofbeldisbrot í Hafnarfirði, sérstaklega alvarlegt hafi verið atvik á Víðistaðatúni þar sem unglingar voru rændir, úlpur þeirra teknar og farið með unglingana í hraðbanka og fjármunir teknir.
Einar segir að heildarkostnaður Hafnarfjarðar vegna móttöku flóttamanna og/eða hælisleitenda hafi numið rúmlega 4,3 milljörðum króna á árunum 2020 til maí 2025, samkvæmt gögnum sem flokkurinn fékk nýlega frá bænum. Einar segir að Hafnarfjörður sé búinn að vera einn stærsti þjónustuaðili ríkisins þegar kemur að móttöku hælisleitenda með vernd og vill hann meina að stjórnmálamenn í Hafnarfirði hafi hingað til ekki viljað ræða byrðina sem af því hlýst fyrir sveitarfélagið og íbúa þess.
„Hagnaður bæjarins, tekjur bæjarins, eru 300 milljónir á þessum árum, þannig að þeir eru í raun og veru í plús. Ef við leggjum það þannig fram, segjum að þetta sé allt greitt af ríkinu sem það er augljóslega ekki. Eftir tvö ár falla þessir einstaklingar beint á kerfi Hafnarfjarðar án þess að það komi endurgreiðsla frá ríkinu. Segjum að ríkið myndi endurgreiða allan kostnað þá er Hafnarfjörður þjónustuaðili fyrir ríkið í þessum málaflokki.“
Segir hann Miðflokkinn vilja benda á að enginn hafi verið spurður, það hafi enginn íbúi Hafnarfjarðar verið spurður. Segist hann heyra það nú í aðdraganda kosninga að íbúar hafi áhyggjur og vilji að málefni hælisleitenda séu rædd.
„Hafnfirðingar greiða í sameiginlegan sjóð sem er útsvarsgreiðslur, fasteignagjöld og allt þetta. Ísland hefur rekið öflugt félagslegt kerfi, það er enginn sem býr á götunni, við erum með fría heilbrigðisþjonustu. Þegar þessi straumur verður á kerfinu okkar, til lengdar gengur þetta ekki upp. Árið 2020 þá er félagsþjónustukostnaðurinn 185 milljónir króna. Svo 2023 er hann kominn í hálfan milljarð, á síðustu fjórum og hálfu ári eru þetta rúmir 2 milljarðar í félagsþjónustu.“
Segir Einar Geir að kostnaðurinn sé eingöngu vegna þeirra einstaklinga sem falla undir vernd.
„Við erum bara með þessi svör frá bænum, við gerum ráð fyrir að þetta séu þessu fyrstu tvö ár, eftir það eru þeir ekki lengur undir þessum lið. Fyrri ríkistjórn missti algjörlega tökin á þessu, Miðflokkurinn var alltaf að reyna einhvern veginn að segja eitthvað og fékk þessar stimplanir að þeir væru rasistar þegar þeir voru að reyna að ræða þetta af skynsemi.“
Einar Geir segist aldrei hafa áttað sig almennilega á hvað hugtakið inngilding felur í sér og að hans mati hafi hún augljóslega mistekist.
„Þessi straumur er mjög mikill, við erum lítil þjóð og auðvitað ráðum við ekki við svona mikinn straum af fólki á stuttum tíma. Það vissu það allir fyrirfram og þess vegna hafa stjórnmálamenn kannski sett höfuðið í sandinn í þessum málaflokki hvort sem það eru Sjálfstæðismenn eða Samfylkingin. Viðreisn hafa farið kannski harðast fram, þeir hafa mótmælt öllum breytingum á útlendingalögum þó þeir segi það ekki í dag.“
Segir hann Miðflokkinn vilja umræðu um málaflokkinn og upplýsingar um hann vera eitthvað sem almenningur á rétt á að fá upplýsingar um.
„Í desember í fyrra skrifaði bæjarstjórn undir nýjan samning um móttöku fleiri einstaklinga. Það sem við munum gera þegar við förum í bæjarstjórn, við ætlum ekki að skrifa undir fleiri samninga. Við segjum bara, samanburður við Garðabæ, við höfum tekið á okkur svo mikla byrði nú er bara komið nóg. Við viljum líka að ríkið sé ekki að setja þessar móttökustöðvar í Hafnarfjörð. Hann er búinn að gera sitt í þessu málaflokki og rúmlega það, þess vegna teljum við að það sé nóg komið. “
