Myndband sem sýnir þegar 19 mánaða barn dettur úr bíl á ferð hefur vakið talsverðan óhug. Atvikið átti sér stað í borginni Fullerton í Kaliforníu á dögunum.

Á myndbandinu má sjá þegar dyrnar á svörtum jepplingi opnast skyndilega þegar bíllinn er í beygju á gatnamótum.

Út úr bílnum fellur lítið barn og sést ökumaðurinn, móðir barnsins, nauðhemla í kjölfarið. Hún hleypur svo út og sækir barnið áður en hún heldur ferð sinni áfram.

Í frétt New York Post kemur fram að atvikið hafi átt sér stað þann 20. janúar síðastliðinn. Barnið var flutt á sjúkrahús í kjölfarið en hlaut ekki alvarleg meiðsl.

Eftir að myndbandið fór í dreifingu á netinu bar lögregla kennsl á ökumanninn sem heitir Jacqueline Hernandez og er 35 ára. Hún hefur verið kærð fyrir að stefna velferð barnsins í hættu.

Kristy Wells, upplýsingafulltrúi lögreglunnar í Fullerton, segir við New York Post að það sé mikið lán að ekki hafi farið verr. Ljóst er að barnið var ekki í viðurkenndum barnabílstól og hvetur Kristy foreldra til að nota viðeigandi öryggisbúnað til að tryggja öryggi barna sinna.