Michael Carrick hefur strax tekist að setja sitt handbragð á lið Manchester United eftir að hann tók við sem bráðabirgðastjóri liðsins út tímabilið.

Carrick hefur þegar gert nokkrar breytingar bak við tjöldin sem hafa vakið jákvæð viðbrögð innan félagsins. Í síðustu viku mætti Carrick ásamt þjálfarateymi sínu, þar á meðal Jonathan Woodgate og Steve Holland, á leik U21 liðs United. Slíkt var ekki algengt í tíð Ruben Amorim og sendir skýr skilaboð um aukna áherslu á akademíuna.

Carrick hefur einnig endurvakið traust á Kobbie Mainoo, sem var lítið notaður undir stjórn Amorim. Mainoo byrjaði í grannaslagnum gegn Manchester City og var valinn maður leiksins.

Að auki hefur Carrick innleitt styttri og ákafari æfingar, auk meiri einstaklingsþjálfun og persónubundnari nálgun.

Smávægileg breyting hefur einnig verið gerð á leikdagsrútínunni, þar sem liðið mætir nú aðeins seinna á leikstað en áður.