Eins og greint var frá í morgun tilkynnti Seðlabankinn að hann hygðist halda stýrivöxtum óbreyttum. Benti Seðlabankinn á í tilkynningu sinni í morgun mikil óvissa sé um verðbólguhorfur og líkur séu á að hún muni aukast á næstu mánuðum.
Sjá einnig: Guðrún segir að slagkrafturinn í sleggju Kristrúnar sé enginn
Björn Ingi, sem starfar sem aðstoðarmaður Sigmundar Davíðs Gunnlaugssonar, formanns Miðflokksins, telur að ýmsar áskoranir bíði Kristrúnar.
„Mitt gamalreynda pólitíska nef segir mér að ekkert muni reynast hagfræðingnum Kristrúnu Frostadóttur jafn erfitt viðfangs sem forsætisráðherra og efnahagsmálin,“ segir Björn Ingi í færslu á Facebook og bætir við:
„Að vaxtalækkunarferlið hafi stöðvast á hennar vakt er auðvitað mikið áfall og þvert á allar yfirlýsingar í kosningabaráttunni og nú þegar seðlabankastjóri lætur skína í möguleikann á hækkun vaxta til að snúa verðbólguna niður hlýtur að fara um formann Samfylkingarinnar sem mundaði sleggju til að berja niður vexti og verðbólgu fyrir litlu síðan.“
Björn Ingi bendir á að fram undan séu fyrstu fjárlög nýrrar ríkisstjórnar.
„Þar vegast á gríðarlegar væntingar einstakra ráðherra um útgjöld til sinna hugðarefna og svo það augljósa verkefni fjármálaráðherrans að styðja við Seðlabankann með aðhaldi í ríkisfjármálum. Tekist er á um þessi mál að tjaldabaki þessa dagana, en í næsta mánuði munu átökin fara fram fyrir opnum tjöldum. Hætt er við að majónesið verði þá fljótt gult í partýinu sem staðið hefur yfir að undanförnu og tónarnir í söng Ingu Sæland taki viðeigandi breytingum.“
