Feðgarnir voru að ganga upp fjallið Mount Whitney í Kaliforníu þann 10. júní síðastliðinn þegar Zane byrjaði að upplifa hæðarveiki og gekk fram af 37 metra klettabrún, að sögn fjölskyldu hans. Unglingurinn hefur verið í dái síðan honum var bjargað og er hann nýlega farinn að anda af sjálfsdáðum.
„Þetta verður sigursaga um lífsvilja að lokum, en við erum í miðri baráttu núna,“ sagði Ryan við SFGATE í lok júní.
Ryan lýsir syni sínum sem reyndum göngugarpi og íþróttamanni sem hefur keppt í langhlaupum, sundi og þríþraut.
Hann segir að Zane fór að sýna merki um hæðarveiki þegar þeir voru komnir á tindinn og sá sýnir af teiknimyndapersónum.
„Hann byrjaði að sjá ofsjónir. Hann vissi að hann væri að sjá ofsjónir, hann sagðist sjá hluti eins og snjókarla og froskinn Kermit.“
Zane virtist líða betur þegar þeir voru komnir neðar, en eftir klukkutíma göngu til viðbótar varð hann aftur ringlaður.
„Ég veit ekki hvað olli því, við vitum það ekki ennþá. Ef ég ætti að giska myndi ég segja samblanda af þreytu, svefnleysi, vökvatapi og eftirköstum hæðarveikinnar. En hann fór að efast um raunveruleikann.“
Hann segir að Zane hafi nokkrum sinnum haldið að þeir væru komnir á leiðarenda og búnir að klára gönguna. Hann hafi líka haldið að hann væri í einhvers konar draum, eins og í kvikmyndinni Inception.
Svo gerðist það versta sem hann gat ímyndað sér. „Ég heyrði fótatak hægra megin við mig og það var Zane, að ganga fram af klettabrúninni.“
Ryan náði að grípa í Zane áður en hann fór fram af og kallaði göngufólk, sem varð vitni að þessu, á hjálp.
Ryan segir að Zane hafi sagt að hann væri á leiðinni að bílnum, en þeir voru enn uppi á fjallinu. Síðan sagðist Zane vera að fara í kvöldmat.
„Ég var eiginlega að tapa viti mínu af hræðslu og vonleysi,“ segir Ryan og bætir við á meðan hann hafi verið að þurrka tár hafi Zane gengið fram af brúninni. „Ég náði honum ekki,“ segir hann.
Talið er að Zane hafi fallið um 37 metra niður.
Sem betur fer var sjúkraflutningamaður meðal göngumanna á svæðinu þennan dag og gat aðstoðað feðgana, en þeir þurftu að bíða í sex klukkustundir eftir þyrlu til að færa Zane á sjúkrahús.
Ryan hlaut höfuðáverka, ökkla- og mjaðmabrot við fallið. Hann hefur verið í dái síðan.
Amma hans greindi frá því nýverið að Zane væri ekki lengur í öndunarvél og farinn að anda sjálfur. Fjölskyldan er bjartsýn um að Zane muni ná bata en ferlið verður langt og strangt.
„Hann er ótrúlegur drengur, afburðanemandi, íþróttamaður og virkur í kirkjustarfi. Ég er heppinn að vera faðir hans,“ segir Ryan.
