Íslenska kvennalandsliðið sigraði Serbíu í vináttuleik ytra í kvöld, en um var að ræða síðasta leik fyrir EM, sem hefst í Sviss á miðvikudag.

Stelpurnar okkar byrjuðu af miklum krafti í hitanum í Serbíu og skom Sandra María Jessen þeim yfir á 3. mínútu. Skömmu síðar tvöfaldaði Karólína Lea Vilhjálmsdóttir forskotið með frábæru skoti.

Ísland ógnaði marki heimakvenna áfram næstu mínútur en slakaði svo vel á og leikurinn rólegur fram að hálfleik.

Fjörið var ekki mikið meira fyrstu mínútur seinni hálfleiks, allt fram að glæsimarki Sveindísar Jane Jónsdóttur fyrir utan teig á 58. mínútu. Sigurinn gulltryggður.

Íslenska liðið fékk svo á sig óþarfa mark þegar Mijana Ivanovic minnkaði muninn skömmu síðar. Ljóst er að Cecilía Rán Rúnarsdóttir í marki Íslands er ekki sátt við sig í þessu atviki, en það var skotið beint á hana.

Meira var ekki skorað og lokatölur 1-3. Ísland hefur svo leik á EM gegn Finnum á miðvikudag. Svo tekur við leikur við heimakonur í Sviss 6. júlí og loks Noreg í lokaleik riðilsins 10. júlí.