Christopher Nkunku hjá Chelsea gæti farið til Manchester United í sumar og Alejandro Garnacho í hina áttina. Þetta kemur fram í Telegraph.

Nkunku hefur ekki staðist væntingar hjá Chelsea og verið í aukahlutverki. Garnacho er þá algjörlega úti í kuldanum hjá Ruben Amorim á Old Trafford.

Garnacho hefur verið orðaður við Ítalíumeistara Napoli en einnig Chelsea, sem ku hafa áhuga á honum. Þá hefur United nú mikinn áhuga á Nkunku samkvæmt nýjustu fréttum.

Telegraph segir þó að afar ólíklegt sé að félögin skipti á leikmönnunum, heldur standi kaupin á þeim báðum ein og sér ef þau ganga í gegn.

Engar viðræður hafa farið fram en áhugi ku vera til staðar beggja megin borðsins.