Ágúst Ólafur Ágústsson hefur verið ráðinn aðstoðarmaður Heiðu Bjargar Hilmisdóttur borgarstjóra. Þetta kemur fram í tilkynningu frá Reykjavíkurborg.

Ágúst Ólafur sat á Alþingi árin 2003 til 2009 og 2017 til 2021 fyrir Samfylkinguna. Hann var einnig varaformaður flokksins árin 2005 til 2009. Hann hefur einnig verið efnahagsráðgjafi forsætisráðherra, setið í bankaráði Seðlabankans og í Evrópunefnd forsætisráðherra.

„Hann vann sem sérfræðingur á aðalskrifstofu Sameinuðu þjóðanna í New York og hefur að undanförnu stundað doktorsnám í opinberri stjórnsýslu. Samhliða hefur hann kennt við Háskóla Íslands ásamt því að sinna ráðgjafarstörfum meðal annars fyrir Sjúkraliðafélag Íslands, Rannsóknarsetur skapandi greina og Ljósið,“ segir í tilkynningunni.

Ágúst Ólafur er lögfræðingur, hagfræðingur og stjórnsýslufræðingur að mennt og á sæti í stjórn Dýraverndunarsambands Íslands og Evrópuhreyfingarinnar.

Hann er kvæntur Jóhönnu Bryndísi Bjarnadóttur, tannlækni og fyrrverandi formanni Tannlæknafélagsins.

„Ágúst Ólafur hefur störf á skrifstofu borgarstjóra og borgarritara í Ráðhúsi Reykjavíkur þann 13. júní næstkomandi.“