Liverpool hefur opinberað fyrstu myndirnar af nýjum minnisvarða á Anfield sem reistur verður til heiðurs Diogo Jota og bróður hans André Silva sem létust á hörmulegan hátt í júlí á síðasta ári.
Minnisvarðinn ber nafnið „Forever 20“ og er ætlað að minnast lífs bræðranna, tengsla þeirra og þeirrar miklu virðingar sem stuðningsmenn, liðsfélagar og fjölskylda bera fyrir þeim. Í miðju verksins er hjartalaga skúlptúr sem vísar í hið fræga markafagn Jota. Frá ákveðnum sjónarhornum má einnig sjá tölurnar 20 og 30 sem bræðurnir báru á treyjum sínum.
Þá verða einnig letraðir inn textar úr söng sem stuðningsmenn Liverpool sungu reglulega fyrir Jota og heyrist enn á 20. mínútu leikja félagsins.
Minnisvarðinn verður staðsettur við 97 Avenue fyrir utan Anfield þar sem þúsundir stuðningsmanna skildu eftir blóm, trefla, bréf og önnur virðingarmerki eftir andlát þeirra. Hluti þeirra muna verður endurnýttur í sjálfan minnisvarðann svo stuðningsmenn verði áfram hluti af honum.
Liverpool segir að minnisvarðinn eigi að standa sem tákn um ást, samstöðu og minningu um tvo menn sem skildu eftir djúp spor hjá félaginu og stuðningsmönnum þess um allan heim.
