Viðar Örn Kjartansson var í agabanni þegar Selfoss mætti Hvíta Riddaranum í 2. deildinni um síðustu helgi og tekur út seinni leikinn í því banni gegn Kormáki/Hvöt á laugardag.

Óli Stefán Flóventsson, þjálfari Selfoss, staðfesti þetta í samtali við Fótbolta.net í dag, en Viðar Örn gekk í raðir Selfyssinga í vetur.

„Það kom upp innanhússmál sem varð til þess að Viðar var utan hóps í síðasta leik og verður ekki í hóp í næsta leik heldur. Málið var tekið föstum tökum innan félagsins og niðurstaðan fól í sér afleiðingar en á sama tíma stuðning við leikmanninn,“ sagði Óli Stefán við Fótbolta.net.

Hann var spurður út í hvort málið tengdist áfengisvanda sem Viðar opnaði sig um í vetur.

„Ég ætla ekki að fara nánar út í persónuleg málefni leikmanna eða tengja þetta við hluti sem Viðar hefur áður rætt opinberlega. Ég vil þó segja að Viðar Örn hefur komið gríðarlega sterkur inn í okkar hóp, hækkað standard og gefið mikið af sér. Okkar fókus er einfaldlega að halda áfram þeirri vinnu og þeim gildum sem við höfum verið að byggja upp innan hópsins og nýta þau verkfæri m.a. til að styðja okkar leikmenn í gegnum erfiða tíma.“