Ena Mahmutovic, markvörður Bayern Munchen, þurfti að klæðast búningi frá andstæðingunum í undanúrslitum Meistaradeildarinnar gegn Barcelona um helgina.

UEFA bannaði Bayern að nota fjólubláa treyju sína þar sem hún þótti of lík búningi dómara eða markvarðar Barcelona, Cata Coll.

Í staðinn fékk Mahmutovic gulan æfingabol frá Barcelona og klæddist einnig stuttbuxum og sokkum frá heimaliðinu, þar sem var búið að líma yfir merki félagsins.

Barcelona vann leikinn 4-2 á Camp Nou og samanlagt 5-3, og er komið í úrslit keppninnar sjötta árið í röð. Í úrslitaleiknum mæta Börsungar Lyon, sem sló út Arsenal í undaúrslitunum.

Glódís Perla Viggósdóttir landsliðsfyrirliði var að sjálfsögðu í byrjunarliði Bayern í leiknum og með bandið.