Michael Carrick var afar ósáttur við dómgæsluna eftir tap Manchester United gegn Leeds United á Old Trafford.
United tapaði 2-1 þar sem Noah Okafor skoraði tvívegis fyrir Leeds og tryggði liðinu sögulegan sigur. Þetta var fyrsta deildartap United á heimavelli gegn Leeds síðan árið 1981.
Stærsta umræðuefnið eftir leikinn var rauða spjaldið sem Lisandro Martinez fékk í síðari hálfleik. VAR-dómarinn John Brooks hvatti Paul Tierney til að skoða atvikið, þar sem Martinez var talinn hafa togað í hár Dominic Calvert-Lewin. Niðurstaðan var rautt spjald og þriggja leikja bann.
Carrick var æfur eftir leik. „Þetta var hræðileg ákvörðun. Ein sú versta sem ég hef séð,“ sagði hann og bætti við að United hefði orðið fyrir slæmum dómum í tveimur leikjum í röð.
Hann gagnrýndi einnig atvik í aðdraganda fyrsta marks Leeds þar sem Leny Yoro varð fyrir höggi. Carrick gaf í skyn að félagið myndi skoða möguleikann á að áfrýja dómnum.
Roy Keane sagði hins vegar að brottvísunin hefði verið ströng en taldi að United yrði einfaldlega að sætta sig við niðurstöðuna og bætti við að slök byrjun liðsins hefði kostað það sigurinn.
