Guðmundur Benediktsson, ástsælasti íþróttalýsandi þjóðarinnar, ræddi það í Vikunni með Gísla Marteini á RÚV fyrir helgi hvernig væri að lýsa leikjum sem sonur hans spilar.

Eins og flestir vita er Albert Guðmundsson, sennilega besti landsliðsmaður Íslands í dag, sonur Guðmundar og lýsir sá síðarnefndi öllum landsleikjum á Sýn.

„Ég veit ekki hvernig þú ferð að þessu. Ef ég væri að lýsa leik þar sem sonur minn væri að standa sig svona væri ég grátandi,“ sagði Baltasar Kormákur í Vikunni, en Albert skoraði tvö mörk í síðasta leik gegn Úkraínu.

Guðmundur segir ljóst að hann þurfi að aðgreina föðurhlutverkið frá hlutverki lýsandans. „Ég þarf að gera það. Það er alveg erfitt stundum. En ég held að ég dragi frekar úr, held það bitni meira á honum að vera sonur minn. Ég ætlast til meira af honum,“ sagði Guðmundur og hló.

Hann var þá spurður að því hvort hann þegi jafnvel bara þegar Albert er með boltann. „Nema þegar hann skorar,“ sagði Guðmundur þá léttur.

Þess má geta að Ísland tapaði umræddum leik gegn Úkraínu 3-5 en fær tækifæri til að rétta sinn hlut gegn Frökkum í kvöld.