Nýr þáttur af Íþróttavikunni kemur út í kvöld eins og alla föstudaga. Þættirnir eru aðgengilegir hér á 433.is og í Sjónvarpi Símans. Í þeim fá þeir Helgi Fannar Sigurðsson og Hrafnkell Freyr Ágústsson til sín góðan gest í viku hverri og ræða það helsta úr heimi íþrótta.

Gestur að þessu sinni er Viktor Unnar Illugason, þjálfari og hlaðvarpsstjarna. Sagði hann frá áhugaverðum sögusögnum sem hann hefur heyrt varðandi Rúnar Kristinsson.

„Ég held hann gæti líka tekið við sem formaður KSÍ,“ segir Viktor í þætti kvöldsins þegar staða Rúnars er tekin fyrir, en hann hefur verið orðaður við þjálfarastarfið hjá Fram.

Ekki er víst hvort Vanda Sigurgeirsdóttir gefi áfram kost á sér sem formaður KSÍ en kosið verður í febrúar.

„Ég hef aðeins heyrt um þetta. Þessir menn sem eru með mikið af slúðri hafa verið að gauka þessu að manni. Að hann hafi áhuga á þessu og að þetta gæti verið möguleiki,“ segir Viktor.

„Hann er landsliðs goðsögn og ef Vanda verður ekki áfram væri bara geggjað að fá hann.“

Umræðan um þetta er í spilaranum en þátturinn í heild er aðgengilegur frá klukkan 19 í kvöld. Hann kemur svo út í hlaðvarpsformi á helstu veitur í fyrramálið.