Bruno Fernandes, leikmaður Manchester United, segir fjölmiðlum að hætta að reyna að fá hann til að tala illa um Cristiano Ronaldo, fyrrum leikmann liðsins.

Fernandes er reglulega spurður út í Ronaldo sem lék með Man Utd í byrjun tímabils en hefur nú kvatt og er í Sádí Arabíu.

Ronaldo fór í umdeilt viðtal við Piers Morgan fyrr í vetur og lét stór og ekki góð orð falla í garð félagsins.

Fernandes þekkir Ronaldo vel enda eru þeir samherjar í portúgalska landsliðinu en hann vill ekki segja neitt slæmt um félaga sinn við fjölmiðla.

,,Ég veit að það er erfitt að sjá Manchester United gera vel en ég hef ekkert að segja fréttunum fyrir utan góðu hlutina,“ sagði Fernandes.

,,Ekki nota mitt nafn til að ráðast á Cristiano. Cristiano var hluti af okkar leikmannahóp hálft tímabilið.“

,,Ég hef sagt það í mörgum viðtölum að alveg síðan við spiluðum við Liverpool höfum við staðið saman sem lið og það er hægt að sjá það á úrslitunum.“