Bruno Fernandes, leikmaður Manchester United, viðurkennir að hann hafi íhugað að yfirgefa félagið í fyrra er framtíðin var óljós.

Þetta var á þeim tíma er Ralf Rangnick var stjóri Man Utd en hann náði alls ekki góðum árangri og var fljótt látinn fara.

Gengi Rauðu Djöflana var alls ekki gott á síðasta tímabili en Erik ten Hag er nú tekinn við og er útlitið ansi bjart á Old Trafford.

Fernandes vildi fá að vita hvað framtíðin bæri í skauti sér í Manchester áður en hann krotaði undir samning til ársins 2026.

,,Ég ræddi við félagið á síðasta ári þegar allir vissu að Ralf Rangnick væri ekki framtíðarstjóri liðsins,“ sagði Fernandes.

,,Ég sagðist geta verið lausn liðsins og vildi hjálpa en vildi einnig vita hvert væri haldið, hvort það væri eitthvað plan, er einhver framtíð hérna?“

,,Þetta var áður en ég skrifaði undir nýjan samning, augljóslega skipta peningarnir miklu máli, enginn getur neitað því, þú vilt alltaf það besta fyrir sjálfan þig.“

,,Á þessum tíma var ég góður peningalega séð og vildi ekki skrifa undir nýjan samning án þess að vita framtíðarstefnu félagsins. Ég vildi vita hvert við værum að fara. Ég vildi vita hvort við ættum einhverja framtíð saman.“

,,Ég vildi vita hvað félagið væri á eftir. Vildi félagið elta bikara og byggja eitthvað upp til að komast í Meistaradeildina?“