Newcastle hefur haft samband við Burnley þar sem félagið hefur áhuga á framherjanum Chris Wood. Þetta segir í frétt Telegraph. 

Hinn þrítugi Wood er opinn fyrir því að ganga til lið við Newcastle.

Það kemur fram í fréttinni að Newcastle vilji klára félagaskiptin strax í þessari viku. Janúarglugginn er nú opinn.

Wood hefur skorað þrjú mörk í 17 leikjum í ensku úrvalsdeildinni á þessari leiktíð. Hann hefur verið á mála hjá félaginu frá árinu 2017.

Þá á Wood 59 landsleiki að baki fyrir Nýja-Sjáland.

Newcastle er ríkasta félag heims eftir að opinber fjárfestingasjóður Sádí-Arabíu keypti félagið í haust.

Félagið hefur þegar fengið til sín Kieran Trippier frá Atletico Madrid í þessum mánuði.