Sean Dyche, þjálfari Burnley, grínaðist með það að hann væri óviss hvort Manchester City væri að reyna að kaupa leikmann eða félag. Heimildir The Sun herma að Englandsmeistararnir séu búnir að ná samkomulagi við Tottenham um kaup á Harry Kane. Kaupverðið er sagt vera á 160 milljónir punda.
Sögusagnirnar komu Dyche í opna skjöldu en hann var spurður í viðtali á talkSPORT hvort að Burnley ætlaði að leggja fram tilboð í Kane. „Ef ég á að segja eins og er þá skildi ég ekki hvort City ætlaði að kaupa félagið eða leikmanninn,“ sagði hann. „Ég trúði þessu varla þegar ég heyrði þetta, en hver veit? Hann er samt frábær leikmaður.“
Dyche veit hversu erfitt það er að kaupa leikmenn í sumarglugganum, en Burnley hafa einungis fengið einn leikmann til liðsins og það er markvörðurinn Wayne Hennessey sem kom á frjálsri sölu frá Crystal Palace. En Dyche vonast til að fá fleiri leikmenn til liðsins áður en leiktíðin hefst aftur þann 14. ágúst næstkomandi.
„Hver einasti leikmaður sem við fáum til okkar þarf að gegna ákveðnu hlutverki hjá félaginu. Þetta hefur verið snúið í gegnum tíðina en við höfum fundið leið til að næla okkur í nokkra mjög góða leikmenn. Við þurfum á auknum gæðum að halda í ákveðnum stöðum og okkur vantar fleiri leikmenn yfir höfuð. Ég er vanur því að vinna við svona aðstæður. Við erum sjaldan í stöðu til að fá efstu nöfnin á óskalistanum því það er of kostnaðarsamt. Við erum oft fyrstir inn og fyrstir út. Við sjáum til hvort við fáum leikmennina sem við teljum að geti hjálpað okkur,“ sagði Dyche.