Billy Gilmour var frábær með Norwich í vináttuleik gegn King’s Lynn Town á föstudaginn.
Daniel Farke þjálfari Norwich varaði við því að setja ekki of mikla pressu á Skotann unga. Gilmour er tvítugur og kom á láni frá Chelsea í sumar eftir að hafa nælt sér í Meistaradeildartitil í maí. Lánssamningurinn er ætlaður til að gefa Gilmour fleiri leiki í byrjunarliðinu.
Gilmour er talinn einn af bestu ungu leikmönnum í deildinni. Hann skein í sínum fyrsta leik fyrir Norwich í 3-1 sigri á King’s Lynn á föstudaginn. Gilmour lék fyrri hálfleikinn áður en hann var tekinn af velli. Hann sýndi góðan leikskilning og kunnáttu sína á boltanum er hann stýrði spili leiksins. Hann gaf einnig frábæra sendingu sem minnti helst á Andrea Pirlo.
Farke var fljótur að hæla Gilmour en sagði stuðningsmönnum að leikmaðurinn þyrfti tíma til að aðlagast liðinu. Farke sagði: „Gilmour er frábær karakter, hann kom á fimmtudaginn eftir smá frí eftir EM. Við sendum hann í nokkur próf og fyrsta æfing hans með liðinu var á föstudagsmorgun. Ég hefði ekki gert það við 37 ára gamlan mann, en það er allt í lagi að henda ungum leikmanni í djúpu laugina. Hann sannaði að hann kynni að synda,“ sagði hann.
„Við erum ánægðir að fá hann til okkar en verðum að vera raunsæir. Við viljum ekki hæla honum um of eða setja pressu á hann. Við verðum að vera varkárir. Við skulum ekki segja of mikið, leyfum honum að tjá sig á vellinum. Hann gerði það í þessum leik. Hann sýndi hvað hann gat, gaf góðar sendingar. Hann þarf að aðlagast okkur, vita hvernig á að pressa, það kemur.“