Bæði karla og kvennalandsliðin gáfu eftir stóran hluta af bónusum og aðrar greiðslur þegar liðin tóku þátt í verkefnum sínum í september. Þetta kemur fram í grein eftir Benedikt Bóas í Fréttablaðinu.

Landsliðsfólkið er meðvitað um það fjárhagslega högg sem KSí hefur orðið fyrir, þannig tapar sambandið um 200 milljónum króna á því að allir landsleikir eru nú fyrir luktum dyrum.

Fyrir sigur í mótsleik fær landsliðsmaður 300 þúsund krónur í vasa sinn en fyrir jafntefli fást 100 þúsund krónur. Strákarnir töpuðu báðum sínum leikjum en stelpurnar unnu Lettland og gerðu jafntefli við Svía, hver leikmaður hefði því átt að fá 400 þúsund krónur. 23 leikmenn og heildarupphæðin hefði því verið 9,2 milljónir sem KSÍ hefði þurft að borga þeim í eðlilegu árferði.

„Það hafa flestir ef ekki allir reynt að láta þetta ganga upp. Þetta er erfitt ástand fyrir okkur eins og marga aðra,“ segir Guðni Bergsson, formaður KSÍ við Fréttablaðið. „Ég held að í þessu árferði og aðstæðum þurfi að standa saman í því að láta enda ná saman. Það kreppir að hjá okkur eins og öðrum.

Guðni greinir einnig frá því að dómarar landsins hafi tekið á sig skerðingu launa.

„Þetta umhverfi sem við öll erum að glíma við, bæði hér heima og erlendis, er eitthvað til að takast á við saman. Fólk er að taka á sig launaskerðingu, minnka starfshlutfall, minnka bónusa og dómararnir tóku einnig á sig skerðingu,“