„Hann gæti mögulega hringt í Heimi ef allt fer í skrúfuna,“ sagði Tómas Þór Þórðarson um leit Guðna Bergssonar og stjórnar KSÍ að næsta landsliðsþjálfari karla.
Umræða er í Katar um það hvort Al-Arabi muni láta Heimi Hallgrímsson fara úr starfi, gengi liðsins á þessu tímabili hefur ekki verið gott. Heimir hefur stýrt Al-Arabi í tvö ár.
Nú er til skoðunar hjá stjórn sambandsins hver tekur við liðinu, Arnar Þór Viðarsson er áfram líklegastur til að taka starfið. KSÍ hefur rætt við Arnar um að taka við en Lars Lagerback hefur einnig rætt við KSÍ.
Tómas telur þó engar líkur á því að Heimir taki við landsliðinu, ástæðan eru deilur hans við KSÍ þegar hann lét af störfum.
„Ég held ég geti lofað því að Heimir og Guðni vinna ekki aftur saman, allt í lagi að hringja og athuga hvort það sé búið að slíðra sverðin,“ sagði Tómas í útvarpsþætti Fótbolta.net um helgina.
Deilurnar snérust um árangurstengda bónusa sem Heimir taldi sig eiga inni hjá KSÍ þegar hann lét af störfum eftir HM í Rússlandi. Lögfræðingur Heimis átti í deilum við sambandið í nokkra mánuði en samkomulagi náðist í mars, ári síðar.
Meira:
KSÍ tekur upp veskið og borgar Heimi og Helga eftir deilur: ,,Skiptar skoðanir voru um túlkun“
