Southampton tók á móti Tottenham í ensku úrvalsdeildinni í dag en leiknum lauk með 1-1 jafntefli.

Davinson Sanchez kom heimamönnum yfir með klaufalegu sjálfsmarki á 15. mínútu en Harry Kane jafnaði metin fyrir Tottenham, þremur mínútum síðar.

Gestirnir sóttu án afláts í síðari hálfleik en heimamenn vörðust afar vel og niðurstaðan því 1-1 jafntefli.

Mauricio Pochettino, stjóri Tottenham var mjög svekktur með að vinna ekki leikinn.

„Þetta var jafn leikur, við vorum meira með boltann en náðum ekki að skapa okkur nægilega mikið til þess að vinna leikinn. Þetta var ekki frábær frammistaða hjá okkur en völlurinn var ekki að hjálpa okkur heldur,“ sagði stjórinn.

„Bæði lið börðust allan leikinn og ég verð að hrósa Southampton. Við vorum samt sem áður ekki að hjálpa okkur sjálfum, við gerðum mörg mistök og þegar að þú gerir mörg mistök þá vinnur þú ekki leiki.“

„Southampton mun klifra upp töfluna en það er sárt að tapa þessum stigum því þau gætu skipt máli í vor enda er baráttan mjög hörð hjá efstu liðunum. Það er mjög erfitt að finna leikmann sem mun hjálpa þér síðustu þrjá mánuðina, fyrir okkur í það minnsta,“ sagði hann að lokum.