Aukin neysla á trefjum, til að mynda sem finnst í kornmeti, pasta, brauði og hnetum, er talin draga úr líkum á hjartasjúkdómum og auki lífslíkur fólks. Þetta kemur fram í viðamikilli, nýrri rannsókn sem gerð var fyrir Alþjóðaheilbrigðisstofnunina.
Höfundar skýrslu um rannsóknina segja þetta mikil gleðitíðindi en að niðurstöður passi að sama skapi ekki við þá tískukúra sem nú tröllríða heiminum, eins og ketó-mataræðið og lágkolvetnakúrinn, þar sem fólk forðast kolvetni í öllum sínum myndum.
Jim Mann, prófessor frá Nýja-Sjálandi, leiddi rannsóknina en í henni er stuðst við gögn víðsvegar um heiminn. Jim segir í samtali við Guardian að rannsóknin skipti töluverðu máli þegar rætt er um mataræði.
„Hér erum við með sterka sönnun að trefjaríkt mataræði, sem fyrir flesta inniheldur mikið af kolvetnum, hefur gríðarleg varnaráhrif – gott er fyrir þá sem þjást af sjúkdómum eins og sykursýki, hjartasjúkdómum og krabbameini að vera á hákolvetna mataræði,“ segir hann.
Í rannsókninni kemur fram að þó kolvetni eins og sykur séu slæm fyrir líkamann séu önnur kolvetni, eins og heilkorna brauð og haframúslí, bráðholl og nauðsynleg manninum. Gott sé að lágkolvetnabylgjan hafi dregið úr sykurneyslu en hins vegar hefur það mataræði dregið úr neyslu á trefjaríkum kolvetnum. Jim segir þó að þessi rannsókn muni ekki enda hið svokallaða „kúrastríð“ því mörg fyrirtæki og einstaklingar eigi hagsmuna að gæta.
Í niðurstöðum rannsóknarinnar kemur fram að mannskepnan ætti að borða að minnsta kosti 25 til 29 grömm af trefjum á dag. Er það gefið til kynna að rúmlega 30 grömm af trefjum á dag sé enn betra, en flestir neyta minna en 20 gramma á dag.