Orri Páll Vilhjálmsson, barþjónn á Apotek Restaurant, fór til Berlín í morgun til að taka þátt í barþjónakeppninni World Class Bartending Competition, stærstu barþjónakeppni heims. Keppnin byrjar í dag og endar á mánudag, en Orri etur þar kappi við bestu barþjóna heims frá 58 löndum.
Keppnin fer þannig fram að á degi eitt er Johnnie Walker-keppni. Eftir hana fara efstu tuttugu barþjónar í Tanqueray og Zapaca-keppni og á degi þrjú fara fjórir efstu barþjónarnir í kokteilakeppnina Cocktail Clash. Að henni lokinni er skorið úr um sigurvegara.
Orri er búinn að vera að undirbúa sig undanfarna mánuði fyrir stóru stundina en hann þarf að reiða fram tugi kokteila undir hinum ýmsu þemum. Reynt verður á bragð-og lyktarskyn og hann mun þurfa að þekkja í sundur tegundir í blindsmakki, ekki hvort þetta sé vodka, gin eða viskí, heldur hvort þetta sé Talisker, Johnnie Walker Black Label eða Singleton.
Keppnin getur verið mikill stökkpallur fyrir barþjóna. Þeir bestu geta rukkað háar fjárhæðir fyrir viðburði og sigurvegari World Class árið 2014, Charles Joly frá fræga barnum the Aviary, sér um kokteilana fyrir Óskarsverðlaunahátíðina og fyrir tískusýningu Victorias Secret. Mjög eftirsóttir barþjónar sem hrista drykki á þeim viðburðum.
Fyrir bar að fá World Class-stimpil jafngildir veitingastað að fá Michelinstjörnu.
Bestu barir landsins taka þátt í World Class keppninni hér heima og stendur þjálfun og viðburðir yfir í marga mánuði og barþjónar eru dæmdir í mörgum drykkjum. Í keppninni senda barþjónar inn tugi kokteila og eru mörg mismunandi þemu sem þeir þurfa að kynna sér og eru prófaði í. Hvort
sem eru sögulegar staðreyndir, hvernig klaki er bestur, árstíðabundin ber, krydd og ávextir, þekkja klassísku kokteilana og barþjónar þurfa að þekkja hvaða tegund er hvað í blindsmakki. Orri setti upp atriði í keppninni hér heima líkt og hann væri að vinna á einum besta kokteilbar heims, American Bar og í fjögurra liða úrslitum flaug hann í gegnum hraðakeppni þar sem þurfti að gera átta kokteila á átta mínútum.