Raunveruleikastjarnan Khloé Kardashian fagnaði sex mánaða afmælis frumburðar síns, hnátunnar True, á föstudaginn.

Khloé á True með körfuboltamanninum Tristan Thompson, en samband þeirra hefur verið mikið á milli tannanna á fólki eftir að upp komst að Tristan hefði haldið framhjá Khloé þegar hún var ólétt. Parið er enn saman, en Khloé hefur verið dugleg að birta dularfull skilaboð á Instagram-síðu sinni sem gefa hugsanlega til kynna að sambandið standi á brauðfótum.

Afmæli True var hins vegar vel heppnað og auðvitað fjölmenntu Kardashian-börnin, til dæmis Saint og Chicago, börn Kim Kardashian og Kanye West, og Dream, dóttir Rob Kardashian.

Khloé leyfði fylgjendum sínum á samfélagsmiðlum að fylgjast með herlegheitunum og lagði áherslu á að bollakökur væri þemað í afmælisteitinu.