Stjórnendur og ráðgjafar WOW air eiga nú í viðræðum við stóru bankana þrjá um hugsanlega aðkomu þeirra að fjármögnun félagsins. Flugfélagið er sagt skoða af fullri alvöru að leita aðstoðar bankanna við að tryggja að lágmarksstærð yfirstandandi skuldabréfaútboðs félagsins náist en það er upp á um 5,5 milljarða króna.

Þetta kemur fram í Fréttablaðinu í dag. Þar segir að Arion banki, Íslandsbanki og Landsbankinn séu nú að skoða hvort þeir muni koma að málinu. Ef þeir ákveða að taka þátt er vonast til að aðrir fjárfestar taki þá þátt í útboðinu. Fréttablaðið segir að ekki liggi fyrir hversu mikið fé bankarnir þurfa að lána WOW air en að kunnugir segi að það séu milljarðar króna.

Stjórnendur WOW air eru sagðir hafa fundað með bankastjórum bankanna í gær. Stefnt er að því að ljúka skuldabréfaútboðinu fyrir helgi og eru ráðgjafar WOW air sagðir hafa orðið bjartsýnni á góðan árangur þegar leið á gærdaginn.

Ríkisstjórnin hefur fylgst náið með framvindu mála enda er mikið undir að WOW air verði ekki fyrir áföllum en það myndi hafa mikil áhrif á ferðaþjónustuna.