Rak upp ljónöskur eftir mark Danny Welbeck – Sigurmark á lokamínútum í toppslag
Ríkharður Óskar Guðnason, eða Rikki G eins og íþróttafréttamaðurinn er jafnan kallaður, hélt svo sannarlega ekki aftur að sér við lýsingu leiks Arsenal og Leicester í gær. Undir lok leiks skoraði Danny Welbeck, leikmaður Arsenal, sigurmarkið og segja má að Rikki hafi gjörsamlega tapað sér.
Mikið var í húfi fyrir bæði lið en Leicester var í efsta sæti ensku úrvalsdeildarinnar á meðan Arsenal var í því þriðja og munaði fimm stigum á liðunum.
Leicester komst yfir undir lok fyrri hálfleiks þegar að sóknarmaðurinn Jamie Vardy skoraði úr vítaspyrnu.
Snemma í síðari hálfleik fékk svo leikmaður Leicester rautt spjald og þeir því manni færri það sem eftir leið leiks. Arsenal tókst að nýta sér liðsmuninn og skora mark þegar síðari hálfleikur var um það bil hálfnaður.
Allt stefndi í jafntefli en á lokamínútu leiksins skoraði Welbeck, í fyrsta leik sínum með Arsenal á tímabilinu, sigurmark leiksins. Við það rak Rikki, sem lýsti leiknum á Stöð 2 sport, ljónsöskur sem vakið hefur talsverða athygli.
Hér má sjá myndband af markinu og heyra viðbrögð Rikka.
Hvernig er hálsinn @RikkiGje ? #fotboltinet #ARSLEI pic.twitter.com/xVjc2ir7cv
— Ólafur Jónsson (@olafurasgeir) February 14, 2016
