Auðugir Bandaríkjamenn eru fremstir í flokki þeirra sem sækja um „gyllta vegabréfsáritun“ til Nýja-Sjálands þessa dagana. Nýsjálenska ríkisstjórnin breytti reglunum um slíkar vegabréfsáritanir fyrr á árinu.

Breytingunum var ætlað að fá auðuga útlendinga til að setjast að í Nýja-Sjálandi. Aðalhugsunin á bak við þetta var að örva efnahagslífið.

Samkvæmt nýju reglunum voru tekjumörkin lækkuð, krafa um enskukunnáttu var felld niður og sá tími, sem umsækjendur verða að eyða á Nýja-Sjálandi, var styttur úr þremur árum í þrjár vikur.

The Guardian segir að nú þegar hafi 189 umsóknir borist fyrir hönd 609 manns. 116 umsóknir bárust í heildina síðasta hálfa þriðja árið áður en reglunum var breytt.

85 umsóknir eru frá Bandaríkjamönnum, 26 frá Kínverjum og 24 frá Hong-Kongbúum. Restin af umsækjendunum er frá ýmsum Asíu- og Evrópuríkjum.