Aðdáendur bandarísku kántrítónlistarkonunnar Dolly Parton safna nú undirskriftum og vilja biðla til yfirvalda um að nafni alþjóðaflugvallarins í Nashville verði breytt og hann nefndur eftir Dolly.

Undirskriftasöfnunin hófst í janúar og hafa tæp 50 þúsund skrifað undir.

Dolly fæddist árið 1946 í Pittman Center, litlum bæ í Austur-Tennessee, og flutti 18 ára gömul til Nashville til að láta draum sinn um tónlistarferil rætast. Hún hefur alla tíð haldið sterkt í rætur sínar í Tennessee og gefið til baka til samfélagsins.

„Sem stoltir borgarar Tennessee, erum við knúin áfram af rótgróinni aðdáun okkar á þjóðargersemi og Tennessee goðsögninni, Dolly Parton,“ segir á vef undrirskriftasöfnunarinnar. „Hún er ekki aðeins frægur listamaður sem hvetur til ástar, viðurkenningar og velvildar með tónlist sinni, heldur líka mannvinur, þekkt fyrir ótal framlög sín til samfélagsins.“

Dollywood, skemmtigarður Dolly sem opnaði árið 1986 er stærsti vinnuveitandinn á svæðinu og veitir um 4.000 manns störf. Síðan 1995 hefur Parton rekið Imagination Library samtökin. Samtökin eru í samstarfi við staðbundna hópa til að veita börnum um allan heim ókeypis bækur.

Hún hefur einnig gefið háar upphæðir í gegnum árin til málefna eins og Hjálpræðishersins, hjálparstarfs fellibylsins Helene og fleira.

„Við óskum eftir því að nafni flugvallarins verði breytt í Dolly Parton alþjóðaflugvöll til að heiðra táknmynd sem hefur gefið ríki okkar og heiminum svo mikið. Við gætum öll verið að leggja í hann frá Parton!“