Þrettán ára stúlka í Rússlandi er í vörslu yfirvalda eftir að hún varð móður sinni að bana en móðirin hafði tekið símann af stúlkunni að sögn vegna stanslausrar notkunar hennar á samfélagsmiðlum.

Mirror greinir frá þessu. Móðirin hét Svetlana Cheglyakova og var 46 ára. Stúlkan skar móður sína á háls og skar svo í sínar eigin hendur og kveikti í íbúð fjölskyldunnar sem er í Sankti Pétursborg.

Stúlkan sagði í fyrstu að karlmaður sem brotist hefði inn í íbúðina bæri ábyrgð á þessu öllu. Fullyrt er í rússneskum fjölmiðlum að stúlkan hafi leikið eftir atburðarás úr hlutverkaleik sem hún hafði spilað á netinu.

Þegar lögreglumenn yfirheyrðu stúlkuna viðurkenndi hún að hafa beitt hnífnum eftir rifrildi um netnotkun við móður sína. Stúlkan sakaði móður sína um óheyrilega stjórnsemi. Hún hafi bannað sér að hitta vini sína og skömmu áður en atburðurinn átti sér stað hafi móðir hennar slegið hana.

Faðir stúlkunnar bjó ekki á heimilinu eftir að hann og Cheglyakova slitu samvistum. Stúlkan er á spítala en hún mun ekki verða ákærð þar sem hún er undir sakhæfisaldri í Rússlandi