Svikarinn og fyrrum athafnakonan Elizabeth Holmes afplánar nú refsingu sína í fangelsi. Þar endaði hún eftir óforskömmuð svik í tengslum við blóðprufufyrirtækið Theranos þar sem hún blekkti fjárfesta með því að sannfæra þá um að hún byggi yfir byltingarkenndri tækni sem gæti greint ýmsa alvarlega sjúkdóma og kvilla út frá aðeins einum blóðdropa.

Á daginn kom að fyrirtækið var byggt á sandi. Blóðsýnagreiningarnar voru ónákvæmar og ekkert af loforðum Holmes stóðst skoðun. Holmes var eins uppvís að því að hafa logið að fjárfestum, svo sem með því að halda því fram að hún hefði gert samninga við stórfyrirtæki á borð við Pfizer og bandaríska herinn.

Árið 2022 var hún dæmd í ellefu ára fangelsi, en rannsókn lögreglu hófst árið 2018. Þarna vissi Holmes í fjögur ár að hún gæti endað í fangelsi en ákvað engu að síður að ganga í hjónaband og eignast tvö börn, en seinna barnið fæddi hún rétt áður en hún hóf afplánun. Eiginmaður hennar heitir Billy Evans og hann hefur nú vakið athygli fyrir fyrirtæki sem hann hefur stofnað.

Fyrirtækið nefnist Haemanthus og hefur boðið byltingarkennda tækni sem greinir kvilla út frá líkamsvessum á borð við blóð. Myndir hafa nú farið í dreifingu á greiningartólinu sem Haemanthus er að búa til en það er sagt sláandi líkt vélunum sem Holmes var með á sínum tíma. Haemanthus einskorðar sig þó ekki við blóð heldur ætlar að nýta tækni sína til að greina líka svita, þvag og munnvatn. Til að byrja með verða prófanir gerðar á dýrum.