Samkvæmt rannsókninni, sem var gerð af National Institute of Health í Bandaríkjunum þá er rétt að hafa í huga að þú getur dreift bakteríum við matseldina, þannig að þær berast í kryddstaukana.
Dagbladet skýrir frá þessu og segir að rannsóknin hafi byggst á tilraun þar sem þátttakendur matreiddu kalkúnaborgara og báru fram með salati. Þátttakendurnir vissu ekki að tilraunin snerist um matvælaöryggi við matreiðslu.
Vísindamennirnir fundu örverur í kalkúninum og bárust þær í kryddstaukana, svokölluð víxlblöndun. Á þann hátt geta bakteríurnar dreifst í hvert sinn sem þú tekur utan um kryddstaukana þína og kryddar matinn.
Rannsóknin leiddi einnig í ljós að á öðrum yfirborðsflötum, til dæmis skurðarbretti og hnífum, voru bakteríur í um 20% af tímanum. Á kryddstaukunum var hlutfallið 48%.
Víxlblöndun er ein algengasta orsök sjúkdóma af völdum matar og matseldar.