Lögreglan í fylkinu Delta í Nígeríu handtók meira en 200 manns, síðastliðinn mánudag, í brúðkaupi samkynhneigðra.
Talsmaður lögreglunnar tjáði fjölmiðlum að 67 manns verði sóttir til saka fyrir að skipuleggja og vera viðstödd brúðkaup af slíku tagi.
Sambönd samkynhneigðra eru refsiverð í Nígeríu og allt að 14 ára fangelsisvist liggur við því að vera í sambandi af því tagi.
Talsmaðurinn sagði viðburðinn vera af hinu illa og að Nígería gæti ekki hermt eftir hinum vestræna heimi:
"Við erum Nígería og verðum að fylgja menningu þessa lands.“
Lögregla sýndi fjölmiðlum nokkur af hinum handteknu sem tjáðu fréttamönnum að þau væru ekki samkynhneigð heldur fyrirsætur og fatahönnuðir.
Nígeríu-deild alþjóðlegu mannréttindasamtakanna Amnesty International hefur sagt að um nornaveiðar sé að ræða og kallaði eftir því að hin handteknu yrðu látin laus þegar í stað. Samtökin lögðu áherslu á að spilling grasseraði í nígerísku samfélagi og að lögin sem bönnuðu samkynhneigð sambönd væru í auknum mæli nýtt af lögreglu og almenningi til að áreita og fjárkúga fólk.
Lögreglan sagðist hafa lagt hald á upptöku af brúðkaupinu og ólögleg fíkniefni og lyfseðilsskyld lyf.
Að sögn lögreglunnar fékk hún veður af viðburðinum eftir að lögreglumenn á eftirlitsferð stöðvuðu einstakling sem var boðsgestur í brúðkaupinu. Sagðist viðkomandi fyrst vera leikari.
Samkvæmt lögreglunni játaði umræddur maður við yfirheyrslur að hann væri meðlimur í tilteknum klúbbi fyrir samkynhneigða og að hann væri á leiðinni í brúðkaup samkynheigðs pars.
Það var CNN sem greindi frá.
