Í nóvember skutu Norður-Kóreumenn nýju ofurvopni sínu „skrímslaflugskeytinu“ á loft í tilraunaskyni. Það vakti að vonum athygli sérfræðinga í málefnum þessa harðlokaða einræðisríkis. En það vakti eiginlega enn meiri athygli þeirra að Kim Jong-un, einræðisherra, tók dóttur sína, Kim Ju-ae, með til að skoða flugskeytið.
Norðurkóreskir fjölmiðlar, sem er öllum stýrt af einræðisstjórninni, skýrðu frá þessu og birtu myndir af feðginunum.
Þetta var í fyrsta sinn sem einræðisherrann sýndi eitt af börnum sínum opinberlega en talið er að hann eigi þrjú börn. Tvær dætur og son.
Umfjöllun norðurkóreskra fjölmiðla um Kim Ju-ae var ekki til þess fallin að draga úr dulúðinni í kringum hana og hlutverk hennar. The Washington Post segir að hún hafi fengið stærra hlutverk við tilraunaskot „skrímslaflugskeytisins“ en Ri Sol-ju, móðir hennar og eiginkona Kim Jong-un, en hún hefur verið sífellt meira í sviðsljósinu að undanförnu.
Norðurkóreskir fjölmiðlar sögðu Kim Ju-ae vera „mest elskuðu dóttir“ einræðisherrans.
En stóra spurningin er af hverju henni var skyndilega ýtt fram í sviðsljósið og hvað það þýðir.
Tvær hugmyndir eru aðallega á lofti sem svar við þessu.
Frá stofnun Norður-Kóreu 1948 hefur Kim-ættin verið við völd en það var Kim Il-sung, afi Kim Jong-un, sem stofnaði landið. Formlega séð er það kommúnistaflokkurinn sem stýrir landinu en þannig er það ekki í raun, það er Kim-ættin sem hefur öll völd í hendi sér.
Kim Jong-un er þriðji ættliðurinn sem stýrir landinu en hver mun taka við af honum er eitthvað sem enginn utan Norður-Kóreu veit og þar í landi er það einungis fámennur hópur sem veit hver verður arftaki hans.
Sumir sérfræðingar telja að „frumsýningin“ á Kim Ju-ae í nóvember hafi verið skilaboð um að erfðaröðin sé á hreinu, hún taki við af föður sínum eða að minnsta kosti sé henni ætlað að stórt hlutverk í framtíðinni.
Yang Moo-jin, sérfræðingur í málefnum Norður-Kóreu, sagði í samtali við Global News að með því að sýna dótturina opinberlega hafi Kim Jong-un verið að senda þau skilaboð að stjórnin í Norður-Kóreu sé í „jafnvægi“.
Það að Kim Jue-ae hafi verið sýnd opinberlega en ekki sonur hans, sem er talinn hafa fæðst 2010, hefur vakið undrun því feðraveldið er mjög sterkt í Norður-Kóreu og því töldu flestir liggja í augum uppi að sonurinn tæki við völdum af föður sínum.
En hugsanlega hefur sýningin á Kim Ju-ae ekkert með valdaröðina að gera. Sumir sérfræðingar telja hugsanlega að með þessu hafi Kim Jong-un viljað styrkja ímynd sína og sýna að hann er fjölskyldufaðir á bak við hrjúft yfirborðið.
