Allt hófst þetta í janúar 2020 þegar Shane Lee var á leið heim úr vinnu. Lögreglan stöðvaði hann og handtók og sagði hann grunaðan um vopnalagabrot. Hann var í haldi lögreglunnar í tæpa viku. Á þeim tíma margreyndi hann að fá lögregluna í Henderson og Las Vegas til að átta sig á að hann væri alsaklaus og ekki maðurinn sem leitað var að. En það var ekki hlustað á hann.
Það var ekki fyrr en lögreglan krafðist gæsluvarðhalds yfir honum að skarpur dómari áttaði sig á að Shane Lee var ekki Shane Neal sem er 26 árum eldri og þar að auki hvítur á hörund.
Washington Post segir að nú hafi Shane Lee höfðað mál á hendur lögreglunni fyrir að hafa brotið gegn stjórnarskrárvörðum réttindum hans og að hafa handtekið hann að ástæðulausu. Í stefnunni segir að ef bara einhver af lögreglumönnunum eða fangavörðunum hefði unnið vinnuna sína, til dæmis borið handtökumyndina af Shane Lee saman við myndina af Shane Neal, hefði verið ljóst að hér var um rangan Shane að ræða.
Það var 8. janúar 2020 sem Shane Lee var á leið heim úr vinnu. Hann ók í gegnum Henderson og þar stöðvaði lögreglan hann og tók niður persónuupplýsingar hans og keyrði í gegnum tölvukerfi sín. Þá birtist handtökuskipun á hendur Shane Brown sem hafði ekki mætt fyrir dóm en hann var grunaður um vopnalagabrot. Lögreglumennirnir handtóku Shane Lee og fóru með á lögreglustöðina þar sem honum var stungið í fangaklefa. En af einhverjum ástæðum áttaði enginn sig á að Shane Lee er svartur, 26 árum yngri en hinn hvíti Shane Neal og þar að auki 10 cm lægri. Shane Lee var hins vegar sviptur ökuréttindum og átti ógreidda sekt hjá lögreglunni í Henderson.
Shane Lee mótmælti handtökunni við alla þá lögreglumenn sem hann hitti á lögreglustöðinni en það stoðaði lítið og hann var látinn dúsa í fangaklefa á lögreglustöðinni í tvo sólarhringa áður en hann var fluttur í fangelsi í Las Vegas. Þar hélt hann áfram að reyna að sannfæra fólk um að hann væri ekki hinn hvíti Shane Neal en enginn hlustaði. Fjórum dögum síðar var hann færður fyrir dómarann Joe Hardy þar sem lögreglan fór fram á gæsluvarðhald yfir honum. En Hardy áttaði sig fljótt á mistökum lögreglunnar og lét hann lausan samstundis.
Shane Lee hefur nú höfðað mál á hendur lögreglunni og krefst 500.000 dollara í bætur.