Yfir átta hundruð manns hafa verið handteknir í 37 borgum um allt Rússland í dag eftir fólkið tók þátt í mótmælum gegn herkvaðningu vegna innrásarinnar í Úkraínu. Þar af voru yfir 300 manns handteknir í Moskvu.
Fréttaritari Sky, Diana Magnay, var viðstödd mótmælin í Moskvu og segir hún lögreglu beita sér á hrottafenginn hátt gegn mótmælendum.
Vladimir Pútín Rússlandsforseti ávarpaði þjóð sína í morgun og tilkynnti um herkvaðningu þar sem 300 þúsund manna varalið yrði kallað út til að berjast.
Eftirspurn eftir flugi frá Rússlandi stórjókst eftir tilkynninguna og sæti í flest flug nánast uppseld. Vefurinn Airlive greindi svo frá því í dag að rússnesk flugfélög væru hætt að selja karlmönnum á aldrinum 18-65 flugmiða, sumsé karlmönnum á þeim aldri að þeir gætu verið kallaðir í herinn, nema þeir geti framvísað sérstöku leyfi frá varnarmálaráðuneyti Rússlands.
Herkvaðningin er sú fyrsta síðan í seinni heimsstyrjöldinni en Pútín sagði að tilgangurinn væri að frelsa Donetsk- og Luhansk-héröðin í Úkraínu og vernda Rússland.
Sjá einnig: Teningunum er kastað – Segir stórstyrjöld yfirvofandi
Þá greindi DV frá því í morgun að leppstjórnir á nokkrum hernumdum héröðum í Úkraínu, þar með talið á Donbas svæðinu, hafi boðað til atkvæðagreiðslu um hvort svæðin eigi að verða hluti af rússneska ríkjasambandinu. Það liggur mikið á því atkvæðagreiðslurnar eiga að hefjast á föstudaginn og ljúka á mánudag. Þetta ber svo brátt að að Rússar og leppstjórnir þeirra reyna ekki einu sinni að láta líta út fyrir að um atkvæðagreiðslur sé að ræða þar sem allt fer heiðarlega fram. Úrslitin hafa verið ákveðin.
Hér má fylgjast með beinni útsendingu frá mótmælunum á CNN News 18