Frans gekkst undir aðgerð á hné fyrir um mánuði síðan. Í kjölfarið sást hann í hjólastól í fyrsta sinn og sögðu margir að hugsanlega væri heilsufar hans verra en talið hafði verið. Nú hefur enn meira spreki verið kastað á bálköst orðrómanna því Frans hefur boðað til sérstaks fundar kardinála kaþólsku kirkjunnar þann 27. ágúst. The Guardian skýrir frá þessu.
Fundir sem þessir eru ráðgjafafundir fyrir páfann en þeir eru einnig ætlaðir til að velja nýjan páfa. Daginn eftir þennan fund mun Frans halda til Abruzzo í L‘Aquila-héraðinu á Ítalíu en þar verður trúarhátíð á þeim tíma og mun páfinn fara að gröf Celestine V en hann lét af embætti páfa 1294 eftir að hafa gegnt því í fimm mánuði.
Benedikt fór að gröf Celestine árið 2009 og eftir það hafa sérfræðingar í málefnum Páfagarðs sagt þá heimsókn hafa verið táknræna því Benedikt lét einnig af embætti en það gerði hann 2013.
Robert Mickens, ritstjóri kaþólska dagblaðsins La Crox, sagði í samtali við The Guardian að það sé mjög undarlegt að boðað sé til fundar kardínálanna í ágúst, þremur mánuðum fyrr en ætlað var, og að Frans fari svo til L‘Aquila.
Viku eftir fund kardínálanna fundar páfinn með þeim til að tilkynna þeim um endurbætur sem hann hyggst gera á stjórnkerfi Vatíkansins. Meðal annars að setja tímamörk á hversu lengi skrifstofustjórar geta starfað þar og að konur geti gegnt yfirmannsstöðum. „Ég held að það komi einnig önnur tilkynning. Það getur vel verið að hún verði ekki um afsögn hans en ég held að það séu töluverðar líkur á því,“ sagði Mickens.