Útvarpsmaðurinn umdeildi Rush Limbaugh er látinn, 70 ára að aldri. Krabbamein varð Limbaugh að bana, en eiginkona hans greindi frá því í útvarpsþætti hans í gær.
Rush Limbaugh stórt nafn í Repúblikanaflokknum í Bandaríkjunum. Útvarpsþáttur hans, The Rush Limbaugh Show, var gríðarlega vinsæll, en hann var á dagskrá í 32 ár og hafði mótandi áhrif á stjórnmál og stjórnmálaumræðu vestanhafs.
Skoðanir Limbaugh voru ansi umdeildar, en þær voru sagðar litast af miklum fordómum gagnvart jaðar- og minnihlutahópum, og þá var hann gjarn á að fjalla um samsæriskenningar. Ein umdeildasta skoðun Limbaugh var þegar hann sagði að James Earl Ray, maðurinn sem myrti Martin Luther King, ætti skilið heiðursorðu bandaríska þingsins.
Samfélagsmiðlar hafa logað í kjölfar andláts Limbaugh, en margir fagna andláti hans. Þetta hefur verið sérstaklega áberandi á samfélagsmiðlinum Twitter, en þar hefur frasinn „hvíldu í hlandi“ (e. rest in piss) verið ansi vinsæll. Þá hafa ansi margir netbrandarar, eða meme, verið búin til vegna andlátsins.
Margir íhaldssamir Bandaríkjamenn hafa gagnrýnt grínið og sagt óviðeigandi að gera grín að og fagna andláti einstaklinga. Margir spaugararnir hafa svarað því með því að benda á hatursfull ummæli Limbaugh, og að hann hafi sjálfur oft gert grín að minnihlutahópum.