Sumir sátu inni í húsinu sjálfu en aðrir voru í garðinum. Þetta segja The Guardian og The Independent. Á þessum tíma var samkomubann í gildi og máttu aðeins tveir aðilar, sem ekki bjuggu í sama húsi, hittast hverju sinni og það utanhúss. Einnig átti fólk að hafa tvo metra á milli sín.
En þetta kvöld sat fólk saman og drakk áfengi. Johnson er sjálfur sagður hafa verið í garðinum í um korter. Inni í húsinu er hann sagður hafa sagt við starfsmann að samstarfsfólk hans ætti skilið að fá einn drykk fyrir að hafa „sigrað veiruna“.
The Guardian hefur eftir heimildarmanni að Matt Hancock, þáverandi heilbrigðisráðherra hafi einnig verið á staðnum. Því hefur talsmaður Hancock vísað á bug.
Málið hefur vakið mikla reiði meðal Breta. Landsmenn eru ósáttir við að á sama tíma og þeim var sagt að halda sig heima og sleppa því að sækja mannfögnuði vegna mikils fjölda smita í landinu hafi Johnson og samstarfsfólk hans skemmt sér. Áður hafði það vakið mikla reiði að Johnson og starfsfólk hans héldu jólahlaðborð í Downingstræti fyrir síðustu jól og einnig hafa komið fram upplýsingar um að fleiri samkvæmi hafi verið haldin á meðan harðar sóttvarnaaðgerðir voru í gildi. Breskir fjölmiðlar hafa nefnt málið Partygate.
