19 ára karlmaður var í gær sýknaður af ákæru um að hafa nauðgað konu. Hann var hins vegar sakfelldur fyrir að hafa „laumast“ til að hafa kynlíf með konunni.  Hann var dæmdur í sex mánaða fangelsi.

Það var Vestri Landsréttur í Danmörku sem kvað dóminn upp í gær og staðfesti þar með dóm undirréttar í Árósum frá því í mars.

Málsatvik voru þau að í janúar fóru maðurinn og þrír vinir hans í sumarhús í Odder og voru tvær jafnaldra konur með í för. Önnur konan stundaði kynlíf með einum vini mannsins af fúsum og frjálsum vilja og maðurinn stundaði kynlíf með hinni konunni í öðru herbergi í sumarhúsinu.

Báðir mennirnir viðruðu hugmyndir við konurnar um að þau myndu „skipta“ á bólfélögum en þær höfnuðu því. En mennirnir gáfust ekki upp og ákváðu að „skipta“ um bólfélaga án þess að konurnar uppgötvuðu það. Seinna um kvöldið skiptu þeir um herbergi en sögðu konunum það ekki.

Maðurinn læddist því inn til hinnar konunnar og þau stunduðu kynlíf en hún stóð í þeirri trú að um hinn manninn væri að ræða.

Maðurinn var ákærður fyrir nauðgun samkvæmt nýju ákvæði hegningarlaganna sem kveður á um að nauðgun sé ekki aðeins þegar samfarir eiga sér stað án samþykkis heldur nái ákvæðið einnig yfir samfarir þar sem annar aðilinn hefur ekki veitt samþykki sitt, til dæmis þar sem blekkingum er beitt eins og í þessu tilfelli.

Á báðum dómstigum var niðurstaðan að maðurinn hefði ekki gerst sekur um nauðgun en að hann hefði ekki fengið samþykki konunnar fyrir samförum og var hann sakfelldur fyrir að hafa beitt blekkingum til að stunda kynlíf en refsingin fyrir slík brot er vægari en fyrir nauðgun.