Heimsbyggðin glímir enn við heimsfaraldur kórónuveirunnar sem virðist ekki ætla að gefa eftir á næstunni. Áhrifa faraldursins mun gæta næstu árin og jafnvel áratugina á mörgun sviðum. Niðurstöður nýrrar rannsóknar, sem beindist að því að kortleggja ákveðnar afleiðingar faraldursins, benda til að faraldurinn verði til þess að fólk lifi almennt skemur en fyrir faraldur. Þetta er í fyrsta sinn síðan í síðari heimsstyrjöldinni sem væntanleg ævilengd styttist.

Rannsókn vísindamannanna beindist að væntanlegum líftíma fólks í 27 Evrópuríkjum og Bandaríkjunum og Chile. Rannsóknin hefur verið birt í vísindaritinu International Journal of Epidemiology.

Samkvæmt niðurstöðunum þá var það bara í Danmörku og Noregi sem fólk gat á síðasta ári vænst þess að lifa að minnsta kosti jafn lengi og árið áður. Í hinum löndunum styttist væntanleg ævilengd á milli ára.

Það eru bandarískir karlmenn sem fara verst út úr þessu en á milli áranna 2019 og 2020 styttist væntanleg ævilengd þeirra um 2,2 ár. Financial Times segir að í Bandaríkjunum hafi ævilengd beggja kynja aldrei styst svo mikið síðan byrjað var að halda utan um tölur þar um árið 1933.

Í 22 af löndunum 29 styttist væntanleg ævilengd fólks um meira en hálft ár og í 11 löndum styttist væntanleg ævilengd karla um meira en eitt ár en hjá konum átti það við í 8 löndum. Til að setja þetta í smávegis samhengi þá tók það þessi lönd 5,6 ár að lengja væntanlega ævilengd um eitt ár. „COVID-19 þurrkaði framfarirnar út á árinu 2020,“ skrifa vísindamennirnir.

Í löndum á borð við Spán, England og Frakkland hefur væntanleg ævilengd ekki styst svo mikið síðan í síðari heimsstyrjöldinni.

Í rannsókninni er væntanleg ævilengd skilgreind sem sá meðalaldur sem nýfædd börn geta vænst þess að ná og er þá miðað við núverandi dánartíðni.