Sky News segir að eitt fórnarlamba hans hafi verið Kimberly Dietz–Livesey en lík hennar fannst í tösku í vegkanti nærri Fort Lauderdale í Flórída í júní árið 2000. Tveimur mánuðum síðar fannst lík Sia Demas í íþróttatösku skammt frá. Í ágúst 2001 fannst lík Jessica Good í sjónum nærri Miami. Hún hafði verið stungin til bana. Konurnar voru allar vændiskonur og háðar fíkniefnum.
Grunur lögreglunnar beindist að Fernandes en hann starfaði þá hjá fyrirtæki í Miami. Hann flúði til Brasilíu en engin framsalssamningur er í gildi á milli landanna.
Í Brasilíu var hann ákærður fyrir að hafa myrt eiginkonu sína en hann var sýknaður því dómurinn trúði frásögn hans um að hann hefði orðið henni að bana í sjálfsvörn. Fjölskylda konunnar var að sögn ósátt við sýknudóminn og reyndi að láta myrða hann. Hann flúði til Paragvæ en lést í flugslysi og var jarðsettur í Brasilíu.
Í millitíðinni hafði lögreglan í Flórída ekki komist langt með rannsókn á morðunum þremur en þegar hún fékk aðgang að gögnum brasilísku lögreglunnar var hægt að gera samanburðarrannsókn á lífsýnum sem fundust á konunum þremur og lífsýnum úr Fernandes. Fyrst varð þó að fá heimild hjá brasilískum dómara til að grafa lík Fernandes upp til að sannreyna að hann hefði ekki sviðsett dauða sinn og útför. Lík hans reyndist vera í gröfinni og lífsýni úr því pössuðu við lífsýni sem fundust á fórnarlömbunum í Flórída.
Gregory Tony, lögreglustjóri í Broward County sagði að „réttlætið hafi ekki síðasta söludag“. „Ég er viss um að það eru fleiri mál. Það eru engin takmörk á hvar hann gæti hafa látið til skara skríða.“
