Sex manns voru skotnir til bana í Plymouth á Englandi síðdegis í gær, þar á meðal barn. Nokkrir liggja særðir á sjúkrahúsi. Sky News segir að lögreglan í Devon og Cornwall hafi staðfest að tvær konur og tveir karlar hafi fundist látin á vettvangi auk hins meinta árásarmanns. Allt féll fólkið fyrir byssuskotum. Kona, sem hlaut aðhlynningu á vettvangi, lést síðar á sjúkrahúsi.
Luke Pollard, þingmaður frá Plymouth, skrifaði á Twitter í gærkvöldi: „Ég er algjörlega niðurbrotinn yfir að eitt fórnarlambanna í Plymouth var barn yngra en 10 ára.“ Hann staðfesti einnig að nokkrir hefðu verið fluttir á sjúkrahús með skotsár.
Lögregla var kölluð til Biddick Drive klukkan 18.10 að staðartíma. Hún lýsti því strax yfir að um alvarlegan atburð væri að ræða en lagði áherslu á að ekki væri um hryðjuverk að ræða og að ekki væri verið að leita að neinum vegna málsins. Fjöldi sjúkrabíla, sjúkraþyrla, lækna og sjúkraflutningamanna var sendur á vettvang. Lögreglan hefur ekki staðfest hvort hún skaut árásarmanninn til bana eða hvort hann tók eigið líf.
Sjónvarvottur sagðist í samtali við BBC hafa heyrt öskur og síðan þrjá eða fjóra skothvelli. „Síðan sparkaði árásarmaðurinn upp hurð á húsi og byrjaði að skjóta af handahófi . . . hann hljóp frá húsinu og skaut á meðan og hélt áfram að skjóta á fólk í Linear Park.“
