Sarah Gilbert, prófessor við Oxford háskóla, stýrir vinnu vísindamanna við háskólann við þróun bóluefnis gegn kórónuveirunni sem nú herjar á heimsbyggðina. Miklar vonir eru bundnar við bóluefnið og að það verði tilbúið til notkunnar innan ekki svo langs tíma. Gilbert segir að hegðun og framferði okkar mannanna í tengslum við náttúruna auki hættuna á að veirur fari á flug um heimsbyggðina og ólíklegt sé að það dragi úr þeirri hættu með áframhaldandi alþjóðavæðingu.

„Meira þéttbýli, meiri ferðalög, eyðing skóga – allt þetta gerir að verkum að það er líklegra að svona faraldrar gjósi upp og breiðist út,“

sagði hún í samtali við The Independent.

„Vegna þess hvernig hlutirnir hafa gengið fyrir sig hér í heiminum, þá er líklegra að sýkingar úr dýrum muni valda heimsfaröldrum í framtíðinni,“

sagði hún einnig.

Flestir vísindamenn telja að veiran, sem veldur COVID-19, hafi borist í menn úr leðurblökum en hugsanlega í gegnum annað dýr. Líklegast á matarmarkaði í Wuhan í Kína þar sem veiran skaut fyrst upp kollinum. Aðrir banvænir sjúkdómar, til dæmis ebóla, Sars og Vestur-Nílarveiran eiga einnig upptök sín í dýrum.