Geimförum um borð í Alþjóðlegu geimstöðinni hefur verið gert að undirbúa sig fyrir að yfirgefa geimstöðina vegna súrefnisleka. Bandarískir geimfarar eiga að vera í skjóli í sínu geimfari á meðan rússneskir geimfarar gera við súrefnislekann.

Samkvæmt Geimferðastofnun Bandaríkjanna, NASA, var fjórum geimförum í morgun gert að klæða sig í geimbúninga og fara inn í geimfarið Drekann ef ske kynni að þeir þyrftu að yfirgefa stöðina. Þeir hafa nú yfirgefið Drekann og er nú fylgst vel með framvindu mála.

Súrefnisleki hefur verið vandamál á stöðinni síðustu ár en það er fyrst núna sem það er talið nógu alvarlegt að það geti stefnt geimförunum í hættu. Rússnesku geimfararnir eru samkvæmt rússnesku geimferðastofuninni, Roscosmos, nú að vinna að viðgerðum í hluta gagna þar sem súrefnið lekur hvað mest.

Hvorug geimferðastofnunin hefur gefið út nákvæmlega hvað felst í viðgerðunum fyrir utan að þær séu miklar. Síðasta mánudag vakti það athygli NASA að súrefnislekinn hafi skyndilega farið úr einu pundi á dag í tvö.

Alþjóðlega geimstöðin tók til starfa árið 1998 og var hönnuð til fimmtán ára. Samkvæmt áætlun á að taka hana úr notkun árið 2030, þá verða einhverjir hlutar hennar nýttir í nýja geimstöð á meðan stöðin sjálf verður látin falla til jarðar.