Vladímír Pútín hefur ekki í hyggju að gefa neitt eftir hvað varðar rússnesk yfirráð og áhrif í Austur-Evrópu og Kákasus. Hann hefur í hótunum gegn Armeníu vegna daðurs landsins um hugsanlega aðild að Evrópusambandinu.

Þetta daður fellur einræðisherranum ekki vel. Á fréttamannafundi, sem fór fram nýlega, sagði hann að það sé rökrétt að efna til þjóðaratkvæðagreiðslu og spyrja armensku þjóðina og sjá hver niðurstaðan verður. Bild og Kyiv Independent skýra frá þessu og segja að síðan hafi Pútín komið með aðvörun:

„Á þeim grundvelli munum við svo taka okkar eigin ákvörðun.“

Og þetta var ekki síðasta hótun Pútíns því eftir að hann mildaði aðeins orðaval sitt og talaði um „blíða, fágaða og hagstæðan aðskilnað fyrir báða aðila“ kom romsan um líkindin með Úkraínu:

„Við sjáum öll hvað gerist í málefnum Úkraínu. En hvernig byrjaði það? Með tilraunum Úkraínu til að ganga í Evrópusambandið.“

Margir alþjóðlegir fjölmiðlar segja að orð Pútíns megi skilja sem hótun um að Rússar séu reiðubúnir til að beita hervaldi ef Armenía reynir að ganga í Evrópusambandið.