Tímaritið TIME birti í gær forsíðu næstu útgáfu af vikuritinu. Á forsíðunni er rauði ramminn sem hefur einkennt hefur TIME og forsíður þess í 97 ár horfinn og svartur rammi kominn þess í stað. Er þetta í annað sinn í sögunni sem ritstjórn TIME tekur upp á þessu. Það fyrra var í kjölfar 11. september 2001. Fyrir réttum 19 árum síðan í dag.
Forsíðan að þessu sinni markar döpur tímamót í sögu Bandaríkjanna. 200.000 Bandaríkjamenn eru nú látnir af völdum Covid-19. Að sögn fréttar Time um málið eru það þrefalt fleiri en létust í Víetnamstríðinu og jafn margir og búa í Salt Lake City. Dauðsföllin í Bandaríkjunum eru fleiri en í nokkru öðru ríki heims.
Forsíðan að þessu sinni er hönnuð af listamanninum John Mavroudis sem studdist við gögn frá gagnabanka Johns Hopkins sjúkrahússins er hann handskrifaði hvern einasta dag tölu látinna. Myndin er þannig tímalína sem hægt og rólega telur upp í 200.000. Myndin er svo römmuð inn, sem fyrr segir, með svörtum ramma í annað sinn í sögunni. „Ég vona að þessi forsíða verði vakning fyrir þá sem eru ónæmir fyrir þessum hörmungum,“ sagði Mavroudis í viðtali við TIME. „Vísindin og almenn skynsemi eru svarið við krísunni.“
Fyrirsögn forsíðunnar er, á móðurmálinu, „An American Failure.“