Þýska lögreglan hefur rannsakað í dag húskofa þar sem kynferðisbrotamaðurinn Christian Brückner bjó á árunum 2013 til 2016. Christian er grunaður um að hafa orðið valdur að hvarfi bresku stúlkunnar Madeleine McCann sem hvarf úr hótelíbúð í Portúgal vorið 2007, rétt tæplega fjögurra ára gömul. Um er að ræða garðlendi (Kleingarten) í borginni Braunschweig. Þar hafði Christian húskofann á leigu. Í gær fann lögreglan leynikjallara í garðlendi í Hannover, sem er borg í nágrenni Braunschweig, en talið er að Christian hafi haft aðgang að því húsnæði.
Í Bild í dag er rætt við rekstrarstjóra garðlendisins sem leigði Christian húskofann og lóðina. Segir hann að Christian hafi verið hlédrægur maður sem hafi komið vel fyrir. Hins vegar hafi hann kvatt mjög snögglega. Hann hafi sagt upp húsnæðinu morgun einn og verið horfinn á braut nær samstundis.
Íbúar á svæðinu sem bjuggu í nágrenni við Christian á þessu tímabili (2013-2016) eru mjög skelkaðir. „Ég óttast að ég hafi sofið ofan á líki“ hefur The Sun eftir einum íbúanum.
Í myndbandi sem fylgir frétt Bild er spurt hvers lögreglan sé að leita í húsnæðinu í Braunschweig. Það hefur ekki gefið upp en talið er að hún gæti verið að leita að líkamsleifum stúlkunnar, fatnaði hennar eða hvers kyns raftækjum sem gætu innihaldið upplýsingar (símar, tölvudiskar, minnislyklar o.s.frv.).
Enn liggur ekki fyrir hvort þessar aðgerðir lögreglunnar í gær og dag hafa skilað einhverjum nýjum sönnunargögnum. Lögreglan hefur sterkan grun um að Christian hafi orðið barninu að bana en talið er að hana skorti sönnunargögn til að ákæra hann.