Fimmtugur Breti féll af svölum á sjöundu hæð á hóteli á Costa del Sol á Spáni aðfaranótt laugardags. Hann lenti á manni sem var fyrir neðan og létust báðir mennirnir.

Sky skýrir frá þessu. Fram kemur að maðurinn hafi fallið af svölum Melia Don Pepe hótelsins í Marbella. Hann hafi lent á 43 ára spænskum karlmanni sem sat á svölum á jarðhæðinni.

Mennirnir voru báðir úrskurðaðir látnir á vettvangi. Lögreglan rannsakar nú af hverju Bretinn féll fram af svölunum.