Danska þingið samþykkti í síðustu viku að frá og með næstu áramótum verði verslunum óheimilt að útdeila ókeypis plastpokum til viðskiptavina sinna. Auk þess verður sett lágmarksverð á plastpoka og mun það nema sem svarar til um 75 íslenskra króna. En það verður ekki bara sett lágmarksverð á plastpoka því það mun einnig ná til bréfpoka og poka úr öðrum efnum. Það verður því ansi hagkvæmt að muna eftir fjölnota innkaupapokum eða netum þegar farið er að versla.

Danska ríkisútvarpið hefur eftir Lea Wermelin, umhverfisráðherra, að þetta sé skref í rétta átt í þeirri viðleitni að draga úr plastnotkun og auka notkun margnota poka. Mikilvægt sé að fólk hugsi sig vel um og nái breyta hegðun sinni í þessum efnum ef hægt á að vera að skila grænni plánetu til komandi kynslóða. Það sé ljóst að þetta eitt og sér leysi ekki vandann en sé mikilvægt skref í að meiri endurnýting verði í hagkerfinu.

Einu plastpokarnir sem verða undanþegnir banninu eru þunnir pokar eins og eru oft notaðir í grænmetis- og ávaxtadeildunum en það er af hreinlætisástæðum og til að koma í veg fyrir matarsóun.

Allir flokkar nema Nye Borgerlige og Liberal Alliance greiddu atkvæði með frumvarpinu.